Como vimos facendo nos últimos seis anos, celebramos a Cea anual da asociación “O cocido de Lefre”. Aproveitamos a cea para entregar as Calderetas de honra e do ano, premios que pretenden recoñecer o traballo dalgunha persoa ou entidade na súa traxectoria vital —a caldereta de honra— ou por algún éxito ou recoñecemento durante o ano —a caldereta do ano—.

Nesta ocasión, a Caldereta de honra recaeu en Emilio Romero Suárez (Milín), e a Caldereta do ano en José Luís Prieto Roca.

Emilio Romero Suárez (Milín). CALDERETA DE HONRA 2011.

Naceu un primeiro de outono de 1924 nunha vivenda do Calexón das Conchas de Ferrol Vello. O seu avó foi “Botero” no peirao de Ferrol, chamábase Antonio Romero “O Andaluz”, a súa avoa foi “Chabolera” da lonxa do mesmo peirao.

Ao trasladaren o seu pai (traballador da sanidade do porto) á Coruña, berrou e berrou ata conseguir quedar a vivir en Ferrol Vello coa súa aboa, quen o criou.

Traballou na pesca do bacallao nos barcos da PYSBE e PEBSA dende 1947 a 1956. e en distintas empresas de montaxe, en refinerías e térmicas ao longo do estado, incluíndo as Canarias, pasando logo a traballar en ASTANO ata o ano 1984, no que se xubila.

Socio fundador da S.D. Portuarios da Asociación Veciñal de Ferrol Vello e do Club do Mar Ferrol, segue dende a súa xubilación a participar en causas sociais: Negativa á planta de gas de Reganosa dentro da ría ou á construción do tanque de tormentas no Xardín das “Ranitas”.

Unha cousa é xubilarse e outra “retirarse”.

Afeccionado á pesca deportiva, Guillermo Llorca falou del como “o maior pescador de chocos da ría”.

José Luis Prieto Roca. CALDERETA DO ANO 2011.

Nado en Narón en 1967, é autor, director de escena e actor galego.

Os seus comezos no teatro inícianse co ingreso na Escola de Teatro de Narón en 1989.

En 1992 funda Caroza Teatro e desde ese momento principia unha vida polifacética arredor da escena como actor, director, mestre e autor de moitas obras de carácter cómico coas que acada varios premios.

Obras:

•Sursum Corda (1994).

•Desjraciados (1997).

•¡Oh! ¿Qué facer cando non sei quen son? (1999).

•Jánsel e Pónsel (2001). Estreada pola compañía Bucanero

•Monólogo do imbécil (2002). Estreada pola compañía Santi Prego e dirixida por el.

•Tres notas (2002). Estreada pola compañía Bucanero.

•Fobias (2002). Estreada pola compañía Lagarta, Lagarta.

•Sé normal. Vota Substancia Bucanera (2003). Estreada pola compañía Bucanero

•Dereita esquerda (2003).

•Farsa de los pícaros del camino (2004) En castelán.

•Por un millón de dólares (2004). Estreada pola compañía Bucanero

•Carambola (Cóncaco-Convexo) (2005). Estreada pola compañía Lagarta, Lagarta.

•Life is a paripé (2007). Estreada pola compañía Obras Públicas e dirixida por el.

•Muñecas (2007).

•O ridículo desamor dun home máis ou menos normal (2007). Estreada pola compañía 40 Pasos e dirixida por el.

•Go on (2009). Unha odisea en Galiza

Premios:

No 1995, gañador do Premio Xuventude ao Mellor texto orixinal.

No 2003, gañador nos Premios Max, ao mellor autor teatral en galego por Monólogo do imbécil.

No 2005, gañador nos Premios Max, ao mellor autor teatral en galego por Fobias.

No 2005, gañador do Premio María Casares ao Mellor texto orixinal por Fobias.

No 2010, gañador do Premio ao Mellor espectáculo por Life is a Paripé no FETEGA.

No 2011, gañador do Premio María Casares á Mellor música orixinal por Life is a Paripé.