O profesor Miguel Barros, impartirá unha conferencia sobre o autor homenaxeado no día das letras galegas deste ano 2009.

“Ramón Piñeiro e Ferrol. Unha figura do galeguismo e símbolo dunha xeración” é o título desta conferencia que neste mes, substitúe a celebración da tradicional tertulia de Lefre do segundo martes de cada mes.

Celebrarase ás 20:30 h. do martes 12 de maio nos locais do Ateneo Ferrolán.

Miguel Barros ten manifestado que este traballo representa un “alegato contra o esquecemento”  do “principal motor dunha nova lectura do galeguismo, e da política galeguista, símbolo de toda unha xeración”.

A lectura da súa tese de doutoramento aporta o primeiro traballo en profundidade sobre a vida e obra de Ramón Piñeiro.

Baixo a dirección de Ramón Maiz, esta obra aporta ademáis documentos inéditos cos que “pretendo situar a obra do filósofo no contorno da construción da resistencia galeguista, deitando unha nova ollada sobre o nacionalismo despois da experiencia da Segunda República”.

Este traballo de Miguel Barros, baixo o título provisional de “Ramón Piñeiro, o Partido Galeguista e o revisionismo galeguista” será publicado en breve, na súa colección ENSAIO, pola editorial Galaxia.

Nesta ocasión, queremos agradecer a colaboración do Ateneo Ferrolán, e agardámosvos o vindeiro martes.