Rubén Coca obtén 2 nominacións para os premios Mestre Mateo do Audiovisual Galego.

O director ferrolano recibiu dúas nominacións na categoría Curtametraxe de Ficción nos próximos premios Mestre Mateo que cada ano concede a Academia Galega do Audiovisual polos seus dous últimos traballos, Mínimo Común Múltiplo e La Princesa Alegría.

Mínimo Común Múltiplo, que podedes ver aquí, foi estreado o pasado 7 de marzo nos Cines Verdi de Madrid. Está rodado integramente en Ferrol e participan os actores Marta Larralde, Alex Neira, Lourdes Sanmartín, Xoel Fernández, Rubén Riós e Fusa Guillén.

A princesa Alegría, estreada o pasado 24 de outubro na Gala de Entrega de Premios que clausurou a V edición do Festival Curtocircuíto de Santiago de Compostela, foi o guión gañador  —de Daniel Utrilla— do concurso Compostela Plató. Rodada en Santiago de Compostela o pasado verán, é un conto que mestura a imaxe real e a animación, a fantasía e a realidade.

A Gala de entrega dos VII Premios Mestre Mateo terá lugar o próximo 30 de abril no Pazo da Cultura de Pontevedra.

Tentaremos estar por alí e SORTE RUBÉN.